ED-in AAP MLA Amanatullah Khan an man

Enforcement Directorate (ED) chuan nimin, September 2 khan Delhi Waqf Board chairman hlui, Aam Aadmi Party (AAP) MLA Amanatullah Khan chu dik lo taka hna laknaa inhnamhnawiha puh a nih chungchangah an man.

ED team hi nimin zing khan Khan chenna inah kalin an man a ni.

Kumin April thla khan central agency hian Khan hi Prevention of Money Laundering Act hnuaiah thu an lo zawtfiah a, hemi ṭum hian Khan chuan an puhnate chu thu dik lo leh belhchian dawl lo a nih thu a sawi.

ED hian kum 2016, November thlaa Central Bureau of Investigation (CBI)-in Khan laka thubuai an lo ziahluh behchhanin Khan hi an chhui a ni. CBI chuan Khan hi Waqf Board chairman a nihna hmang dik loin, hna thar laknaah mi 35 chuang chu Wakf Act leh Delhi Wakf Rules-a Section 24 bawhchhiain a thun niin a sawi a, an zingah hian Board chief executive officer pawh a tel tih an sawi. Hei bakah Waqf Properties Lease Rules palzutin, phalna nei loa mi eng emaw zat Waqf property-a awm tir an nih vangin Board chuan sum tam tak a hloh phah tih an sawi bawk. Kum 2023, October thla khan ED chuan hmun eng emaw zat dapin, heng zingah hian Khan nena inkaihhnawihna neite pawh an tel.

ED hian AAP hruaitu dang, Delhi chief minister Arvind Kejriwal leh deputy chief minister hlui, Manish Sisodia, AAP Rajya Sabha member Sanjay Singh bakah AAP communications in-charge hlui Vijay Nair te chu Delhi excise policy case-ah a lo man tawh bawk. Singh leh Sisodia hi bail-in an chhuak mek a ni.