Telangana leh AP-ah tuilianin chhiatna thlen nasa: Ni 2 chhungin mi 25 in nunna an chan

Telangana leh Andhra Pradesh-ah ni hnih chhung nasa taka ruah sur vanga chhiatna thlengah mi 25 in nunna an chan tawh. Prime minister Narendra Modi leh union home minister Amit Shah te chuan state pahnih chief minister -N Chandrababu Naidu leh A Revanth Reddy te be pawpin, sorkar laipui aṭanga ṭanpuina awm thei ang ang pek an tiam.

State pahniha tuilian kaihhnawih chhiatna thlengah hian National Disaster Response Force (NDRF) team 26 te chu chhawmdawlna leh chhanchhuahna hna thawk tura tirh luh an ni tawh.

Andra Pradesh chuan Vijayawada hmuna tuilian tuarte chhanchhuah hna leh chhawmdawl hna thawhna tura power boat an indaih lohna chu CM Naidu chuan Pathianni khan Amit Shah hnenah thlenin, power boat leh NDRF team a dil belh. Amit Shah chuan Naidu hnenah hian power boat 40 leh helicopter paruk chu state khawthlang lama hna thawk tur hian an thawn belh thu a lo hrilh.

Tuilian hian state chhung hmun hrang hranga rel kawngte a chim avangin rel 140 lai din tirin, eng emaw zat kalkawng thlak sak an ni bawk. Ruah sur nasat avanga hriat lawk loh chhiatna thleng thei laka inven nan nimin aṭang khan sikul chawlh puan a ni bawk.

Telangana sorkar chuan an state chhunga thingtlang khaw 115 te chu an khaw panna kawng hmun eng emaw zat chu ruah sur vanga chhia in, tlawhpawh theih lohin an awm tih a tarlang.