Bengal dodal zawng thu thehdarh vangin Trinamool-in TV Channel pathum boycott

West Bengal-a rorellai, Trinamool Congress (TMC) chuan tun hnaia doctor zirlai pawngsual leh thahna thlengah, Bengal tichhe thei leh dodal zawnga thu dengkhawng tak thehdarhtu news channel pathum an boycott.

Chief minister Mamata Banerjee kaihhruai TMC sorkar chuan channel pathum an boycott-ah hian sawi hona neih turah pawh an party aiawh an tir dawn lo tih an sawi.

News channel pathumte chu Delhi lam thuneitute tih lawm tum tia puhin, mipuite pawh heng channel-a sawi hona neihah an party thlawptu lam nia langten thu an sawite chu awih lo turin an chah a, heng mite hi TMC in an tirh an ni lo a, party aiawhtu an ni lo tih an sawi a ni.

TMC chuan, Bengal mipuite chu hetianga dik lo taka thu thehdarh ṭhin hnawl a, thu belhchian dawl lo aiin thu dik zawk chu an thlang zel a ni, tiin thu an chhuah a ni.

Hetih lai hian Kolkata-a sorkar enkawl damdawi-ina pawikhawihna thleng chungchangah hian BJP chuan Bengal CM chu hmeichhiate himna pe thei loah puhin, bang turin an phut. Tualthahna thleng chungchangah a hma lak dan leh, nawrh huaihawt doctor-te a hmachhawn danah state sorkar hian beih leh sawisel a tawk nasa hle a ni.