Congress hruaituin Governor post tih tawp a duh

Eptu party-te sorkarna state hrang hrangah, BJP kaihhruai National Demcoratic Alliance (NDA) sorkarin a ruat, Governor leh state inkarah inepna a awm chhoh zel avangin, Congress party hruaitu hlun, Abhishek Singhvi chuan Governor post hi tih tawp mai a duh tawh tih a sawi. Anih loh pawhin Governor atan hian politics lama inhnamhnawihna nei ngai lote chu lungrual taka an pawm tlan theih chu ruat ni ṭhin se a duh tih a tarlang.

Telangana aṭanga Rajya Sabha member atana chuhtu awm loa thlan tlin, Singhvi hian Parliament in hniha Chair leh eptu member-te inrem lohna awm fo ṭhin pawh chu sawi chhuakin, Chair chuan party leh mimal duhsak bik a neih lohna tura a dinhmun siamṭhat chu a ngai a ni, a ti bawk.

MP term li ni tawh, Singhvi hian BJP kaihhruai sorkar chuan institution tinte chu a ti hluiin a dah hniam a, hei hi a hlawhchhamna nasa tak a ni tiin, ṭum eng emaw zat governor-te chu second chief executive ang maia an inngaih chang pawh a awm a ni, a ti. Chief minister-te tan governor chu hnawksak leh an dinhmun tiderthawng thei an nih chuan, governor chu chhuah tir a ni mai tur a ni tiin, Governor tan ni loin, CM tan inthlan hi buatsaih a nih zawk thu Singhvi chuan a sawi.

Tun hnaiah eptu party sorkarna, Tamil Nadu, West Bengal leh Karnataka-ahte state sorkar leh an governor-te inkarah inepna nasa tak a awm mek a ni.