Supreme Court-in IT Act-a Section 66A a hnawl

Supreme Court chuan online-a thil post avanga man theihna dan, Information Technology Act-a Section 66A chu nimin khan hnawlin, he dan hian freedom of speech a kalh a ni, a ti.

Thutlukna a puan rual hian SC chuan IT Act Section 66A hi a fiah tawk lo a, ram danpui Constitution 19(1)A palzutna a nih thu a sawi. Court chuan 66A hian , 'thu sawi tur leh thil tarlanna atana mimal zalenna neih' a nghawng a ni tiin, mi pakhat tana thil ngeiawm tak chu midang tak a lo ngeiawm kher lo thei a ni, a ti.

SC chuan cyber law chungchanga petition eng emaw zat lutte a enfiah hnuah nimin khan Section 66A hian mimal zalenna tam tak a dodal a, wesbite-ah midangin an huat theih thil post vang ringawta man theihna dante a huam tel niin a sawi.

IT Act Section 66A hnawlna tur thutlukna hi Justice J Chelamesar leh RF Nariman-te awmna bench in a pass a ni. Additional Solicitor General Tushar Mehta chuan sorkar chuan mi tupawh, thu sawi leh lantir tura zalenna an neih te phuarbeh sak a duh lo tih a sawi a, ram danpui pawhin he zalenna hi a pek a ni, a ti.

Section 66A ennawn tura PIL thehluh hmasak ber chu kum 2012 kha niin, petition thehluttu hi law student Shreya Singhal a ni. Singhal chuan Shiv Sena hotu, Bal Thackeray thihna avanga Mumbai-a pawnchhuah khap a nih ṭuma a sawisel zawnga Facebook-a thu post-tu leh a lo like-tu, a ṭhiante man an nih vang­in dan hi ennawn turin petition a thehlut a ni.

Kum 2013, May 16 khan Supreme Court chuan social networking site-ah huat theih thil post-tute chu police senior officer, IG emaw DCP emaw te phalna hmuh loh chuan man theih an ni lo ang, tiin a lo rel tawh a ni.