Bawngsa khapna duh loin Mumbai-ah kawng zawh

Maharashtra sorkarin an state chhunga bawng talh leh bawngsa zawrh leh lakluh a khap avanga lungawi loin nimin khan Mumbai-ah kawngzawh huaihawt a ni.

Kawngzawh huai­hawttu zinga mi, Sarvashramik Sangh secretary Vijay Dalvi chuan, "State chhunga bawngsa khap a nih avang hian direct leh indirect-in bawngsa lama sumdawnnaa inhnamhnawih mi nuai tel a nghawng a ni," a ti. Hei hian sa dang man pawh nasa takin a tih to phah a, restaurant leh ei tur siamna dawr dangah pawh thil ei man a to phah vek a ni, a ti.

Dalvi chuan Denoar Abattori aṭangin kawng hi zawhin, Azad Maidan thleng an zawh dawn tih a sawi. Kawngzawhnaah hian beef industry aiawhte bakah Tata Institute of Social Sciences zirlai te, NGO aiawh te, Congress, Nationalist Congress Party, Samajwadi Party leh eptu party dang hruaitute pawh an tel.

Sorkar survey buatsaiha a lan danin, Maharashtra state-ah hian bawngsa, kelsa leh arsa lama sumdawnna licence nei hi 978,000 an awm a, an zinga 20% chu bawngsa-a sumdawng an ni.