Rajnath Singh-a'n sakhaw tinte himna dah pawimawh

Union Home Minister Rajnath Singh chuan ram chhunga sakhaw tlem zawkte himna chu sorkar­in a ngai pawimawh tih a sawi a, hemi rual hian sakhaw inlehtir thleng ṭhin chu thil ṭul lo a ni a, inleh khapna dan khauh tak siam a ngai a ni, a ti.

Tun hnaia Sangh Parivar leh a zawmpuite'n Hindu sakhuaa lakleh runpui an buatsaih ṭhin chuan sawi­selna a tawk mek a, hei hi BJP chuan sakhaw inleh khapna dan siam a ngaih thu nawrna atan a hmang a ni.

Delhi-a state minorities commissions annual conference a hmanpuina­ah he thu hi sawiin, Singh chuan, "Sakhaw tlem zawkte zingah him loa inhriatna a awm a, an tan hlauhthawn tur a awm lo tih hi an rilruah kan tuh a ngai a ni. Thil thleng dik tawk lo chu a awm ṭhin a, mahse sorkar hian thil engkim a ti dik vek thei bik lo. Hindu-a laklet leh tih te, sakhaw inlehtir tih chung­changahte chuan khaw­tlang mipuite'n sorkar an thawhpui a ngai a ni," a ti.