South Sudan aṭangin India mi 500 chuang hruai chhuak dawn

Tualchhung indona thlen mekna, South Sudan ram aṭangin India mi 500 chuangte thlawhtheihna hmangin hruai haw an ni dawn.

Minister of State for External Affairs VK Singh chu nimin zing khan South Sudan pan hian a kal a, a kaihhruaina hnuaiah hian India mite hruaichhuah beihpui, Operation Sankat Mochan neih a ni ang.

Sipai hotu hlui, VK Singh rual hian C-17 Globemaster Indian Air Force aircraft pahnih chuan South Sudan khawpui, Juba hi an pan a ni. Nimin chawhma dar 11 vel khan Juba hi an thleng a, Indian Embassy chuan valid travel document neite chu India rama an haw phalsak nghal an ni dawn tih a sawi.

South Sudan ramah hian kar kalta aṭang khan sorkar sipai leh helpawlte an inkap a, Juba khawpuiah buaina hi a nasa zual a ni. He khawpuiah hian India mi 450 vel an awm a, South Sudan ram hmun dangah mi 150 vel an awm bawk niin External Affairs Minister Sushma Swaraj-i chuan a sawi. South Sudan-a India mi awm, hruaichhuah duhte chu embassy-ah in report turin a ngen a, nimin thleng khan mi 300 vel an in register tawh a ni.

General VK Singh hi foreign ministry official ṭhenkhatten an ṭawiawm a, Juba aṭanga hruaichhuah tur zat chiah an la hriat theih loh thu an sawi.

UN chuan South Sudan tualchhung indona thleng vang hian an ram mipui 36,000 vel chu himna zawngin an tlanchhe tawh niin a sawi. Ram hrang hrang embassy te chuan an mi leh sate chu an ram lamah an hruai haw mek a ni.