Kashmir-ah mi pathum thih belh

Kashmir Valley-a tualchhung buaina thleng vangin mi pathum an thih belh leh a, curfew pawh puan chhunzawm zel a ni.

Hospital thuchhuak chuan security force-te silai kah vanga hliam, mi pahnih chu damdawi-in lama enkawl an nih hnuah an hliam tuar loin an thi a, Anantnag-a Harnag bialah police officer-in midang pakhat a kaphlum leh bawk niin an sawi.

Police-te chuan mipui nawrh huaihawtten lunga tawngin police-te an bei chhunzawm zel niin an sawi a, Nilaini khan Kashmir chhim leh hmara hmun 13-ah pawikhawihna a thleng leh a ni, an ti. Shopian district-ah pawh helhoin police officer pakhat an bei bawk. Special Operations Group member pakhat chu Thawhlehni khan mipui pungkhawmten an hal a, police, politician leh party office-te an beih chhunzawm bawk.

State sorkar chuan sorkar laipui hnenah nawrh huaihawtnaa lunga intawng avanga mita hliam tuarte enkawl turin eye specialist surgeon tir turin a ngen. Health Department chuan mipui leh security force-te hnenah ambulance-te bei tel lo turin an ngen a, mipui pungkhawmte hian ambulance 60 chuang zet an bei tel tawh a ni.

Hizbul Mujahideen commander, Burhan Muzaffer Wani thah a nih avanga Kashmir tualchhung buaina thleng vang hian mi 1,400 chuangin hliam an tuar. Hliam tuar zinga mi 330 chu Pulwama damdawi-inah enkawl an ni a, Kulgam-ah mi 200, Anantnag-ah 115, Baramulla-ah 100, Bandipora-ah 120, Srinagar-ah 49, Shopian-ah 40 leh Budgam district hospital-ah mi 30 enkawl an ni. An zinga tam tak hian an mitah hliam tuarin, eng emaw zat chu khaw hmu thei tawh lo turte an awm a ni.

India lak aṭanga inlakhran duhtu pawl hruaitu Mirwaiz Umar Farooq, Syed Ali Shah Geelani leh Yasin Malik-te chu Nilaini khan kum 1931-a martarte zahna lantira kawngzawh huaihawt an tum avang≠in man an ni. Thu≠chhuah inṭawm siamin, inlakhran duhtu pawl hruaitute chuan ni hnih dang nawrh huaihawt leh an tum thu sawiin, Pakistan-occupied Kashmir-a chengte pawh an nawrh huaihawt hi zawm turin an sawm.

Kashmir buaina chung≠changa UN Secretary General Ban Ki-moon thuchhuah chu an thlawp thu sawiin, an buaina chinfel tura inrawlh turin UN an ngen.