Dan loa lut Muslim nuai 50-te dapchhuakin India aṭangin umchhuah an ni ang :Bengal BJP chief

West Bengal BJP chief  Dilip Ghosh chuan a ṭul nih chuan India rama dan loa rawn lut, Muslim mi nuai 50-te chu dapchhuakin, India ram aṭangin umchhuah an ni ang, a ti. 

North 24 Parganas district-a rally-naa thu a sawiah, Ghosh chuan Trinamool Congress hotu leh West Bengal chief minister Mamata Banerjee chu na taka sawiselin, Muslim-te umchhuah an nih chuan hnam leh sakhaw bil tlawn lungawi tuma Matama-in hma a lak ṭhin pawh a tawp phah dawn a ni, tiin a sawi. 

"Dan loa lut Muslim-te hi voters' list aṭangin paih an ni ang a, didi (Mamata Banerjee) hian tumah a tlawn thei tawn dawn lo a ni," a ti. Voters' list aṭang paih an nih chuan kum 2021-a state assembly inthlan an neih hunah Mamata Banerjee vote-tu tur pawh an tlem sawt dawn a ni tiin Ghosh chuan a sawi a, BJP in seat 200 a lak laiin Banerjee kaihhruaite chuan seat 50 pawh an la tawh lo ang, a ti. Congress leh eptu party dangte pawh CAA an dodal chungchangah sawiselin, dan loa India rama rawn lutte tan an thinlung an lo pe zawk a ni, tiin a sawi.

Bengal BJP hian a hma pawhin inhnialna thlen thei thu a sawi tawh bawk. Kar liamta  khan CAA duh lohna lantira nawrh huaihawtnaa buaina chhuak chungchangah, sorkar thil tichhe zawnga chete chu kahhlum mai tur an ni, tiin a lo sawi tawh a ni.