India leh Qatar-in Inremna paruk ziak

India rama cham mek, Qatar lal, Tamin Bin Hamad Al Thani chuan nimin khan Prime Minister Narendra Modi a kawm. Ram pahnihte hian thawhdunna tur inremna thuthlung paruk an ziak nghal.

Emir hi ni hnih cham turin a rawn zin a, nimin zing khan Rashtrapati Bhavan-ah a lawmna inkhawm hman a ni. External Affairs Minister Sushma Swaraj nen inkawm­in, a hnuah Hyderabad House-ah Prime Minister nen inbiakna an nei zui a ni.

Ram pahnihte'n inremna paruk an ziah zing­ah hian mi tang inthleng tawnna turte pawh telh a ni a, hei bakah hian Information and Communication Technology-a thawhdunna tur te, Ministry of Earth sciences leh Qatar Meteorological Department for Scientific and Technical thawhdunna, Diplomatic Institute of the Ministry of Foreign Affairs, Qatar leh Foreign Service Institute of the ministry of external affairs thawhdunna tur, Rado leh Television field-a thawhdunna turte pawh a tel.

Inremna an siam hnuai­ah hian Qatar-a India mi, thiam loh chantira tang mekte India rama Qatar mi tangte nena inthleng theih a ni ang a, an tan hun hmabak chu anmahni ram jail-ah an tan chhunzawm dawn a ni.

Qatar Emir hi minister, senior official leh industry hotu eng emaw zatin an ṭawiawm.

Kum 1999, 2005 leh 2012 khan Qatar Emir hlui, Sheikh Hamad Bin Khalifa Al Thani chu India ramah a rawn zin tawh a, kum 2008 November thla khan Prime Minister hlui Manmohan Singh chuan Qatar hi a lo tlawh tawh bawk.

Qatar-ah hian India mi 600,000 vel hna­thawkin an awm mek. Ram pa­hnihte insumdawn tawnna hi US dollar tluklehding­awn 16 hu vel a ni.