Sorkar laipuiin state hnenah mega food park 17 a pe

Sorkar laipui chuan state sorkar leh private firm hrang hrang hnenah mega food park 17 siam phalna a pe dawn.

Mega food park-ah hian food processor, loneitu, retailer leh exporter-te hnenah facility hrang hrang a pe, hengte hi food processing industry-te chak zawka an ṭhan theihna tura ruahman a ni.

Mega food park 17 siamna tur project senso hi cheng vaibelchhe 2,030 vel tura ruahman a ni a, heng zinga cheng vaibelchhe 850 chu sorkar laipui hian a pe ang. Heng park-ahte hian food processing unit-te'n cheng vaibelchhe 4,000 hu investment an tih rin a ni bawk.

Food Processing Minister Harismrat Kaur Badal chuan, "Ministry-in state sorkar leh private firm aṭangin food park 17 siamna tur hian rawtna 72 a dawng tawh a ni. Mega food park 7 chu state sorkar hnenah pein, a dang 10 chu private firm hnenah pek a ni," a ti.

Kum 2008-09 a mega food park siamna tur scheme duan hnuaiah, Food Processing Ministry chuan ramchhung hmun hrang hrangah project 42 a sanction tawh a, food park 25 siam a ni tawh bawk.

Minister chuan food park 17 hi thla 30 chhunga siam hman an ni tur a ni, a ti. Mega food park tinah hian food processing unit 40-50 vel a awm ang.

Mega food park pakhat ṭheuh siam tur hian Punjab, Haryana, Andhra Pradesh, Telangana leh Odisha-te chu thlan an ni a, Kerala sorkar chu pahnih siam phalna pek a ni bawk. Heng food park-ahte hian hnathawktu mi 80,000 vel rawih an ni dawn a, loneitu nuai 5 chuangin an hlawkpui beisei a ni bawk.