Covid-19 kai hmuh chhuah thar 90k chuang awm Enkawl dam 77.32% tling tawh

India ramah Covid-19 hripui lengin ziaawm lam a pan thei lo a, ni khata sample endik zat a pun nasat rualin hri kai hmuh chhuah thar an pung tam dawn niin a lang.

Ministry of Health and Family Welfare-in nimina report a tihchhuahah chuan Inrinni khan hri kai hmuh chhuah thar 90,632 lai an awm a, hei hi ni khata hri kai hmuh chhuah tam ber niin India hian ni khata hri kai hmuh chhuah lamah khawvel record ṭum eng emaw zahna turin a siam leh a ni. 

Nimina sorkar report tihchhuah thleng hian India ramah hri kai hmuh chhuah 41,13,811 an awm ta a, Asia rama hri kai tam ber ram India-ah hian hri kai hi an pung chak hle. Hri kai an pun chak rual hian enkawl dam pawh an tam tawh hle a, darkar 24 chhungin enkawl dam 73,642 lai an awm leh bawk a, hei nen hian hri kai dama puan 31,80,865 an awm tawh. Mi 1,065-in an thihpui belh leh a, Covid-19 vanga thi 70,626 an awm tling tawh bawk. Hri kai mek 8,62,320 an la awm.

Enkawl dam tawh rate hi 77.32% a ni a, thihpui rate chu 1.72% niin hri kai mek aiin enkawl dam tawh hi a let 3.7-in an tam tawh a ni.

Indian Council of Medi­cal Research (ICMR) chuan Inrinni khan sample 10,92,654 an endik leh tih nimina report an tihchhuahah an tarlang a, hri len ṭantirh aṭanga nimin report an tihchhuah thleng hian sample 4,88,31,145 an endik tawh. 

Sample endikna tura laboratory pawmpui 1652 an nei tawh a, chung zinga 1027 chu sorkar laboratory niin 625 chu private laboratory a ni thung.

ICMR chuan contain­ment zone-a awm zawng zawngte chu rapid antigen testing (RAT) hmanga endik turin thurawn a tichhuak a, RAT test-a negative, symptom neite chu RT-PCR hmanga endik leh turin thurawn an siam a ni.

India ramah hian ni 13 chhungin hri kai nuai 30 aṭangin nuai 40-ah an kai hman a, US leh Brazil ai pawhin hri kai hi an pung chak zawk.

Hri kai tam lamah pathumna la ni mek mah se hri kai tam ram pahnihna Brazil aiin sing kua vel chiahin hri kai an tlem tawh zawk a ni. 

Covid-19 kai zingah ventilator hmanga enkawl 0.5% an awm a, 2% vel chu ICU-a enkawl niin 3.5% chu oxygen hmanga enkawl an ni bawk.