Punjab leh Chandigarh-ah health ministry-in team tir lut

Union ministry of health chuan hmanhmawh thlak takin ni 10 chhung awm turin Punjab (State) leh Chandigarh (UT)-ah team a tir lut a, team-te hian Covid-19 dona kawngah state thuneitute  an pui ang.

Team tirhluhah hian member pahnih an awm a, PGIMER-a community medicine expert pakhat leh NCDC-a epidemiologist pakhat an ni. Team hian Punjab leh Chandigarh-a containment area-a hmalak dan tur an rel pui dawn a, fimkhur taka invenna tur kalpui dan turte ruahman puiin, hri kai nia ringhleh test an neihpui dan tur te leh damdawi-in lama an inrelbawl dan tur thlengin an hrilh ang. Health ministry-in team a tirh chhan ber hi hri kai a pun loh nan leh hri vanga thi an tlem phah theih nana tih a ni.

Punjab-ah hian nimin thlenga hri kai zat hi mi 60,013 an awm tawh a, hri kai la enkawl mek hi mi 15,731 an awm bawk. Chandigarh-ah hian hri kai mi 5,268 an awm tawh a, heng zinga mi 2,095 chu hri la kai mek an ni. Punjab-a Covid-19 vanga thi hi mi 1,808 an awm a, Chandigarh-ah hian mi 69 an awm thung.  

Hri vanga thi an tam hlauhthawnawmna state leh UT apiangah health ministry chuan team a tir lut ṭhin a, hei vang hian hlauhthawn thilah inven lawk a nih theih nan Punjab leh Chandigarh-ah hian team tirhluh an ni ta a ni.