Bengal Nun pawngsualtu nia rinhlelh man

West Bengal, convent school-a kum 72 mi, Catholic nun pawngsual rawntu zinga pakhat nia hriat chu Nilaini zan khan khan Mumbai-ah man a ni a, midang pakhat chu nimin khan Bengal-ah man a ni bawk.

Pawngsual thlenna hmuna CCTV footage-ah hian mi pali hmel lang mah se, West Bengal police-te hian mi pahnihte tih loh chu pawikhawihtute hi man an la nei lo. Nun pawngsualtute hian nun quarters an luh hma hian chapel-a Isua lim an tihchhiat bakah, convent school hi an suasam a, office cupboard aṭangin cheng nuai hnih an la a, chapel-a bungraw hlu dang­te an la tel bawk a ni.

Damdawi-ina enkawl a nih laiin, vanduaina tawktu nun hian amah pawngsualtu chu a ngaihdam thu leh, an tan a ṭawngṭaisak thu a sawi.

West Bengal-a nun chunga pawikhawihna rapthlak tak thleng leh, tun hnaia ramchhung hmun hrang hranga Kristian-te biak-in beih a nih fo avangin nimin khan Jharkhand-a Kristian missionary-te chuan Kristian leh sakhaw tlem zawkte himna ngaihtuahsak turin Chief Minister Raghubar Das hmuh an rel.

Conference of Religious India (CRI) leh All Churches Committee Ranchi (ACCR) chuan sakhaw hmun pawimawh suasam leh sakhaw rawngbawltu chunga pawikhawihna thlengte hi an duh lohna lantirin kawngzawh huaihawt an tum bawk.

Prime Minister Narendra Modi chuan sakhaw behchhana inbeihna thleng ṭhin titawp tura a beih tur thu leh, Bengal nun chunga thil thleng chu pawi a ti hle tih a sawi tawh a ni.

Maharastra Chief Minister Devendra Fadnavis chuan Navi Mumbai-a biak-in suasamtute chu darkar 48 chhung ngei man turin Thawhṭanni khan thupek a lo tichhuak tawh a, mahse nimin thleng khan man an la awm lo.

Maharastra police-te chuan kar kalta Inrinnia Saint George Catholic church beitute hi mi pahnih hmaituam an nih thu sawiin, sakhaw thil anga beihna ni loin, misual thiltih hrim hrim nia a lan thu an sawi. Minority affairs minister Eknath Khadse chuan mi­sual thiltih nia ngaih ni mah se, he thilah hian politics leh thildang inrawlh a awm leh awm loh chhui chian a nih tur thu leh, pawikhawihtute pawh mana hremna na tak pek an nih tur thu a sawi.