Maha-ah bawng talh luia puh mi pathum thubuai siamsak

Maharashtra sorkarin an state chhunga bawng talh leh bawngsa zawrh khapna dan a siam hnuah, mi pathum chu bawng pahnih talh luiah puhin thubuai siamsak an ni.

Police-te chuan bawng pahnih sa hi an mansak a, mahse a talhtua puh mi pathumte hi an tlanchhia a ni. Heng mi pathumte hi thiam loh chantir an nih chuan dan thar hnuaiah hian kum nga thleng lung-in tantir leh, Rs 10,000 chawitir theih an ni ang.

Maharashtra sorkarin dan thar a siamah hian bawngsa kawl ringawt pawh pawikhawihna a tling.

Kum 1976 aṭang khan Maharashtra-ah hian bawng talh khapna dan siam a ni tawh a, mahse tuna dan siam ṭhat hnuaiah hian bawng chauh ni loin sial talh pawh khap tel vek a ni. He dan thar vang hian Mumbai khawpuiah ringawt pawh bawng sa zawrhna dawr 1,000 in an tawrh phah bawk.

India hi khawvela bawngsa thawnchhuak tam ber dawttu ram niin, a ei nasa ber panga-na a ni bawk. Central-a BJP kaihhruai NDA-in sor­karna a chan hnuah, Hindu pawl tam zawk chuan thuneitute hnenah bawng humhalhna tur dan siam turin an nawr a ni.

Kum 2014 chhunga India-a bawngsa eiral zat chu ton maktaduai 2.3 a tling a, hemi chhung veka bawngsa leh bawngsa a thawnchhuah zat chu ton maktduai 1.95 a ni. Ramchhung hmun ṭhenkhat­ah bawngsa hi khap ni mah se, chhim lam leh hmarchhak lamah chuan sa dang aiin a la tlawm zawk a ni.