Telangana CM-in tui lenna hmun a tlawh

Telangana chief minister Revanth Reddy chuan Thawhlehni khan Mahabubabad district-a tuilian nasa tak thlenna hmun a tlawh a, tuilian leh ruahsur kaihhnawiha nunna chan chhungte hnenah zangnadawmna Rs nuai 5 pek a nih tur thu a puang.

State chhunga ruahsur nasa avanga tuilian hian thlai chinna ram acres 30,000-a zau a chim a ni. Heng ram neitute hnenah hian ṭanpuina hi acre khat-ah Rs 10,000 zel pek a ni dawn bawk.

Mahabubabad district-a ruah nasa taka sur hian chhiatna a thlen tam hle a, tuilian vang hian mi paliin nunna an chan bawk a ni. Tuilian vang hian CM chuan prime minister Narendra Modi hnenah lehkha thawnin, Telengana-a ruahsurin chhiatna a thlen chu national disaster-a puang turin a ngen.

CM Reddy chuan chhawmdawlna hna thawhktu te chu fakin, hmun hniam laia cheng chhungkaw 680 lai mai hmun him lama an sawn chhuak chu fakawm a tih thu a sawi. Mimal ang pawhin Sub-Inspector Nagesh chu Seetharam Tanda hmuna chengte harsatna tawh a lo puihbawm danah a fak hle tih a sawi bawk a ni.

Reddy chuan official-te hnenah chuan tuilianin chirh a len khawm te thianfai tur leh thosi vanga harsatna thleng theite buaipui nghal turin a chah. District thuneitute pawh tuilian thlen mai theihna hmun leh chhiatna thlen theihna bawhzui dan tur fel taka siamsa awmna "bluebook" siam turin a hrilh bawk.