PM Modi-an mi hausate LPG subsidy titawp turin ngen

Prime Minister Narendra Modi chuan mi hausa leh awmtheite chu mipui nawlpuite'n an chhawr ṭang­kai theihna turin ei­rawngbawlna gas, LPG man tlawma an lak ṭhin chu titawp ngam turin a ngen.

Nimina mega energy conclave, Urja Sangam a hawnnah he thu hi sawiin, PM chuan rampawn lam aṭanga energy chawkluh chu kum 2022-ah sorkar laipui chuan 10% a tihniam a tum tih a sawi bawk.

Conclave thupui atan hian 'Shaping India's Energy Security' tih hman a ni.

Oil company-te'n kum li chhungin chenna in vaibelchhe khat hnenah eirawngbawlna gas pipe connection pek hman an tum chu PM chuan sawi­chhuakin, mi hausa zawkte'n LPG susidy an titawp a nih chuan cheng vaibelchhe 100 vel zet hum theih a ni dawn a ni, a ti.

Modi chuan, "A hmain LPG subsidy titawp tura ngenna hi nasa vak loin ka lo sawi chhuak tawh a, mi nuai 2.80-te'n min chhang tawh a ni, heta ṭang hian cheng vaibelchhe 100 vel kan hum thei dawn a, hengte mi retheite hamṭhatna atan hman a ni ang," tiin a sawi.

Sorkar laipuiin man tlawma zawka eirawng bawlna gas lak dan thar, direct benefit transfer (DBT) scheme a siam aṭangin mi tam tak chuan subsidy scheme hi an zawm lo. Modi chuan gas man tlawmna sum luhna turin Jan Dhan scheme hnuaiah bank account vaibelchhe 12 hawn a nih thu a sawi. Midang kaltlanga loa gas neitute bank account-a sum dahluh hi eiruk dona ṭangkai tak pakhat a nih thu a tarlang bawk.

Conclave hi PM chuan sorkar flagship oversea oil firm, ONGC Videsh Ltd Golden Jubilee pual­a buatsaih a ni a, PM hian Golden Jubilee hriat­reng­na atan hian stamp a tlangzarh nghal bawk.