Sonia Gandhi-in land bill chungchanga inbiak rawtna hnawl

Congress President Sonia Gandhi chuan BJP kaihhruai NDA sorkarin land bill a siam danglam chungchanga inbiak a rawtna chu a hnawl.

Sorkar laipuiin land bill a siam danglam hi Lok Sabha-ah pass a ni tawh a, Rajya Sabha-ah ngaihtuah leh a ni ang. Bill siam danglam a nih dan hi eptu party hrang hrang bakah NDA hnuaia BJP thawhpui party ṭhenkhat pawhin nasa takin an sawisel a, loneitute ngaihthah a, sumdawng liante duhsakna atana siam danglam a ni, an ti.

Gandhi chuan loneitute chu ram chakna thapui ber a ni tih sawiin, loneitute rilru natna thlen zawnga dan siam reng reng chu Congress party chuan a thlawp dawn lo tih a sawi. BJP leh Congress party dang­lamna chu loneitute harsatna hriatthiam chungchangah a ni tiin, Modi-a kaihhruai sorkar chuan mi narante tan a ding ang ti siin sumdawng lian leh hausate ṭhatna tur bak a thlir thei lo tih a sawi.

Party hrang hrangte'n nasa taka an dodal avangin sorkar lapui chuan eptu party hrang hrangte chu land bill chungchang hi sawipui tumin a be mek a ni. Union Transport and Shipping Minister Nitin Gadkari chuan sorkarin a ṭul angin bill chung­changah hian debate neih pawh a hreh lo tih a sawi.