AAP-in Yadav leh Bhusan-te nihna hlihsak

Aam Aadmi Party (AAP) chuan an party hotu, Arvind Kejriwal leh an party kalphung sawiseltu, hruaitu pa­hnih Yogendra Yadav leh Prashant Bhusan-te chu kar kalta Inrinni khan party rorelna sang, National Executive member an nihna a hlihsak. Nimin khan Bhusan hi party discpilinary committee member a nihna hlihsak a ni leh bawk.

Yadav leh Bhushan-te bakah, Yadav-a thlawptu Anand Kumar leh Ajit Jha-te pawh NE member aṭang hian ban an ni bawk.

Inrinnia NE meeting-ah hian an hruaitu pahnih helte banna tur resolution hi Manish Sisodia chuan pharhin, member 247 in ban an duh a, member 10 in ban an duh loh laiin midang 54 chuan vote an thlak lo thung.

Yogendra Yadav leh Prashant Bhusan-te hi AAP dintu zinga mi an ni a, mahse Delhi-a AAP-in sorkarna a siam hnuah an party hotu, Kejriwal-a a mimal duh dan anga ro relah an puh a ni. Thuthar lakhawmtute hmaah an party laka an lungawi lohna hi an puanchhuah avangin party Political Affairs Committee member an nihna aṭangin ban an lo ni tawh bawk.

Nimin khan AAP hruai­tute hian Kejriwal-a chenna inah meeting an nei chhunzawm leh a, Bhushan chu disciplinary committee aṭanga banin, committee hi din ṭhat nghal a ni. Hei bakah hian Lokpal committee pawh an din ṭha bawk.

Nimin vek khan AAP chuan an party hotu, Kejriwal-a'n Yadav leh Bhusan-a te'n an party an phiarruk dan chung­chang a sawina video an tichhuak. Kejriwal chuan, "Prashant Bhusan leh Yogendra Yadav-te hian Delhi inthlan hma khan press conference huaihawt a, kan party tihchhiatah min lo vau tawh a ni. Mahse hruaitu lamin hnehna kan chan ngei tur thu leh, party hming tihliau zawnga che lo turin an hneh thei a ni. Hetiang hian kum khat vel chu party lakah hian an hel tawh a ni," a ti.