RS-a Land Bill thlawp lo turin Congress-in AIADMK ngen

Congress party chuan BJP kaihhruai NDA sorkarin land bill a siam dang­lam chu Lok Sabha-a pass ni tawh mah se, Rajya Sabha-a ngaihtuah a nih hunah thlawp lo turin Jayalalithaa-i kaihhruai AIADMK a ngen.

Congress hruaitu Jai­ram Ramesh chuan BJP-in Land Acquisition Bill a siam danglam dan an party mal duhdan ang a ni tiin, loneitute hmakhua an ngai lo a, sumdawng lian leh thiltitheite duhsak zawnga siam danglamah a puh. Land Bill siam danglam hi eptu pawlte bakah NDA hnuaia BJP thawhpui party ṭhenkhat pawhin an dodal a ni.

Ramesh chuan party hrang hrang, loneitute leh ram neitute ngaihsaktute chu party inkara inhriatthiam lohna awmte dah ṭha a, BJP Land Act hi dodal turin a ngen a, a bikin AIADMK chu Rajya Sabha-ah loneitute leh kut hnathawktute an thlawpzia lantir turin a ngen.

Hetihlai hian Parliamentary Affairs Minister Venkaiah Naidu chuan Land Bill an siam dang­lamna chu ngaihtuah ṭhat a ni dawn lo tih a sawi a, sorkar thu­tlukna siam chu a ṭha tawk niin a sawi. Minister chuan land act vanga Parliament-a rorel thei loa inhnial buaina awm chhanah Congress party a puh bawk.

Cabinet Committee on Parliamentary Affairs chuan Land Bill siamṭhat hi Rajya Sabha-ah pass a nih theihna turin Rajya Sabha session neih hun chu pawtsei turin President Pranab Mukherjee an ngen tawh bawk.

Land Bill hi Lok Sabha-ah pass a nih tawh vangin April 5 hma ngeiin Rajya Sabha hian a pawm hman a ngai a, hemi chhunga pawm a nih loh chuan Parliament in hnihah hian a bul aṭangin put luh leh a ngai dawn a ni. Rajya Sabha-ah hian NDA hian member a nei tlem zawk a, hei vang hian bill hi tlang tur chuan eptu party ṭhenkhatte a hmin theih a ngai dawn a ni.