Kashmir-ah tuilian leh leimin vangin mi 10 an thi tawh

Jammu and Kashmir-a Kashmir Valley-ah ruahsur nasa avangin tui a lian a, leiminin mi eng emaw zat a chhilh bawk.

Charar-e-Sharief biala Laden khuaah leiminin in pahnih a hnawl avang­in mi 21 chu chin hriat lohin an awm a, nimin tlai lam khan leiminin a hnawl zinga ruang 10 chu hmuh an ni. Ruah sur nasa avangin nimin khan Srinagar leh Sangam bialah chuan Jhelum luiin hlauhawm chhin­chhiahna a pel tawh a ni.

Leimin leh tuilian vanga harsatna tawkte chhanchhuak leh chhawmdawl tur hian National Disaster Response Force pahnih tirh nghal an ni a, NDRF team hi Bhatinda, Punjab aṭang­in IAF thlawhtheihna hmangin Srinagar-ah hruai an ni. NDRF director gene­ral OP Singh chuan Ghaziabad leh Bhatinda-ah team dang pali pawh a ṭul huna koh theih tura inrin tir an ni tih a sawi.

Jammu and Kashmir Chief Minister Mufti Mohammad Sayeed chuan nimin vek khan tuilenna hmun hi a tlawh a, tui­lian tuarte chu chhawmdawlna pek a tiam. State sorkar chuan tuilenna biala chengte ṭanpui tur­in thawktu leh khawlte pawh dah nghal an nih thu a sawi bawk.

Prime Minister Narendra Modi chuan Kashmir-a tuilian leh mipuite'n harsatna an tawh dante a hmuna enfiah turin Minister Mukhtar Abbas Naqvi a tir nghal a, state thuneitute nen ṭanpuina pek dan turte ngaihtuah ho turin a ti a ni.

Jhelum lui hian nimin zing khan Ram Munshibagh leh Sangam-ah hlauhawm chhinchhiahna, ft 18 leh 22 an thleng tawh a, ft 23 a tlin chhoh chuan sorkarin lui kam chhehvela chengte chu a thiar­chhuah vek a ngai dawn a ni.

Leiminin chenna in 40 chuang a tichhia a, Jammu-Srinagar high­­­way pawh khar a ni. Kulgam, Pulwama, Bara­mulla, Kupwara, Gan­derbal leh Kargil dis­trict-ahte chuan vur tawlh a hlauhthawnawm avang­in warning tih­chhuah a ni bawk.