Ram puma bawng talh khap tumin kan bei dawn: Rajnath Singh

Union Home Minister Rajnath Singh chuan BJP kaihhruai NDA sorkarin rampumah bawng talh khap a nih theihna turin theihtawp a chhuah dawn tih a sawi.

Pathiannia Shwetambar Jains sakhaw hruaitute intawhkhawmnaa thu a sawiah, Rajnath Singh chuan, "Kan ramah hian bawng talh hi kan pawm tur a ni lo. Bawng talh khap a nih theihna tur hian theihtawpin kan bei dawn a, lungrual taka he dan hi siam a nih theihna turin hma kan la dawn a ni," a ti.

BJP sorkarna, Madhya Pradesh leh Maharashtra-a bawng talh leh a sa zawrh khap a nih chungchang pawh sawichhuakin, BJP-in bawng talh khap a tum tak takzia ringhlel lo turin a chah. Maharashtra sorkar­in bawng talh khapna bill a pass pawh a taka hman a nih theihna turin rang takin President hnenah a pawmpuina la tura thawn a nih thu a sawi.

Madhya Pradesh, Gujarat leh Maharashtra state-te chu bawng talh khapna dan an siam avanga a fak thu sawiin, Singh chuan Atal Behari Vajpayee Prime Minister-na hnuaia minister a nih lai pawh khan bawng talh khapna bill hi pharh a lo duh tawh a, mahse a ti thei ta lo niin a sawi.

Madhya Pradesh Chief Minister Shivraj Singh Chouhan pawhin thu sawiin, bawngtalh chu tualthahna nen a teh­khin a, a kaihhruai sorkar chuan bawng talh khapna dan khauh tak a siam ta tih a sawi. Chouhan chuan bawng talh chauh an khap lo a, a sa zawrh, kawl leh ei pawh an khap tel tih a sawi bawk.

Shivraj Singh Chouhan chuan a kaihhruai sorkar chuan eng kawng mahin bawngsa thawn­chhuah pawh a phal dawn lo a, thlai lam ei ṭhatzia chawilar tumin a bei dawn a ni, a ti. Hun eng emaw kalta aṭang khan an state chhunga ran talhna hmun siam tumna pawh a lo hnar tawh tih a sawi.

Union Minister Singh chuan Parliament in hnih­ah bawng talh khapna dan pass turin NDA sorkar chuan majority a neih a ngai a ni, a ti. Lok Sabha-ah NDA hian majority nei mah se, Rajya Sabha chu eptu lamin an thunun thung a ni.