LS Speaker-in all party meeting a ko

Parliament Monsoon Session, vawiina neih ṭan tur thlirin nimin khan Lok Sabha Speaker Sumitra Mahajan chuan all party meeting a ko.

Sorkar laipui chuan tun ṭum session-ah hian hun rei tak a buaipui tawh, Goods and Service Tax (GST) bill chu pass theih ngei a tum a, hei vang hian hemi chungchang hi party hrang hrang hruaitute pawh sawipui an ni. Kar kalta Ningai khan senior minister Arun Jaitley chuan Rajya Sabha-a Opposition Leader Ghulam Nabi Azad leh a deputy, Anand Sharma-te pawh a lo kawm tawh bawk. BJP kaihhruai NDA-in majority a neihna, Lok Sabha-ah chuan awlsam takin tlang mah se, Rajya Sabha-ah majority a neih phak loh avangin GST bill tlang tur chuan sorkar hian Congress thlawpna a hmuh a ngai a ni. Congress-in a pawmpui thei lo a nih chuan Regional Party zawng zawng thlawpna a neih a ngai thung ang.

Congress party chuan a bul lo ṭan tawh, GST Bill hi a thlawp reng tih a sawi a, mahse tuna NDA sorkarin bill a putluhah hian thil ṭhenkhat siamṭhat a phut a ni.

Vawiin aṭanga Parliament Monsoon Session neih ṭan tur hian ni 20 a awh dawn a, hemi chhung hian Lok Sabha-ah chuan bill 10 putluh beisei a ni. Bill puhluh tura beisei zingah hian Benami Transactions (Prohibition) Amendment Bill 2015, Lok Pal and Lokayuktas and Other Related Laws (Amendment) Bill te a tel.