Governor ruat hmain state sorkar rawn ni rawh se : Kejriwal

Prime Minister Narendra Modi-a hoa state leh Union Territory chief minister ten Inter-State Council meeting a neihah, Delhi Chief Minister Arvind Kejirwal chuan state ṭhenkhata chhuanlam holam tak tak hmanga President's Rule puan a ni chu a duh loh thu a sawi.

Inrinni-a New Delhi-a Inter-State Council meeting neihah hian, Kejriwal-a chuan an state tan cheng vaibelchhe 5,000 pe turin sorkar laipui a dil. Kejriwal chuan, Inter State Council chuan Governor leh Lieutenant Governor-te ruat an nih dawnah, an awmna tur state-te rawn an nihna turin resolution pass ngei se a duh thu a sawi. Hei bakah hian khawi state-ah pawh President's Rule chu Assembly-ah rorellai party-in majority a neih phak loh chauhin puan a ni tur a ni tiin, sorkar laipuiin a ruat Governor-ten an thuneihna dik lo taka hmang a, chhuanlam holam tak siama puang tawh lo tura a duh thu a sawi.

Ramchhung hmun hrang hranga loneituten harsatna an neih mekte tihziaawmna turin an loan lakna leiba neih mek chu ngaihdam sak turin sorkar laipui a ngensak bawk.

Bihar Chief Minister Nitish Kumar pawhin Governor post siam chu titawp tura a duh thu a sawi bawk. He post hi tihbo theih a nih loh chuan, Governor ruat leh ban chungchangah state chief minister-te chuan thuneihna an nei ve tur a ni, a ti. Governor ruat dan chu langtlanga kalpui tur a ni tih sawiin, Nitish Kumar chuan Sarkari Commission-in Governor ruatna tura inkaihhruaina a siamte chu zawm a ni ngei tur a ni, a ti.