Kashmir-ah curfew puan chhunzawm zel
Kashmir Valley-a tualchhung buaina chhuak vanga curfew puan chu Pathianni khan a ni kuana atan puan chhunzawm a ni.
Police official chuan curfew hi Valley chhung district 10-ah hman chhunzawm a ni a, dan leh thupek kengkawh turin security force-te ngawrh taka duty tir an nih thu a sawi.
Tualchhung buaina chhuak vanga thi hi mi 41 an ling tawh a, kar kalta Inrinni khan curfew puan a ni chungin mipuiten Kupwara district-ah police-te daidanna siam chu an halsak. Mipui pungkhawmte hnawhdarh nan police-te chuan silai an hmetpuak a, mi pakhat a thi.
Chanchinbu hrang hrang pawh ni hnih chhung tihchhuah a ni tawh lo a, state sorkar official-te chuan chanchinbu neitute hnenah July 19 thleng tichhuak lo turin an ngen. Cable television pawh nikhat tihtawp a ni a, mahse Inrinni zan aṭang khan tihchhuah phalsak an ni. Mahse TV operation-te chuan an cable aṭanga Pakistan TV channel pahnih leh private Indian channel pahnihte tihtawp an tiam thung.
South Kashmir-ah chuan nimin khan a ni riatna atan mobile phone internet leh call operation-te tihtawp a la ni a, central leh north Kashmir-ah pawh ni hnih chhung tihtawp a ni tawh bawk.
North Kashmir Baramullah leh Bannihal khuaa rel service pawh tihtawp lailawk a la ni a, State Public Service Commission (PSC) in recruitment interview a koh pawh cancel a ni.
Kashmir Valley huam chhunga school, college leh university zawng zawng chu khar chhunzawm zel an la ni. Zirna in hrang hrang hi July 24 thleng khar an ni ang.
Buaina a punlun zel tur venthawn thilah inlakkhran duhtu pawl hotu, Syed Ali Geelani, Mirwaiz Umar Farooq, Muhammad Yasin Malik, Shabir Ahmad Shad leh midang ṭhenkhat chu pawn chhuak thei loin hren an la ni bawk. Hetihlai hian inlakhran duhtute hian vawiin pawh hian lungawi lohna lantira nawrh huaihawt an la tum.
July 9-a security force-ten firfiak Wani leh a thurualpui pahnihte an kahhlum avanga tualchhung buaina chhuakah hian mi 41 an thih tawh bakah mi 3,160 in hliam an tuar tawh a, hliam tuar zingah hian security force mi leh sa 1,500 an tel.