Kum ruk chhungin mi 3,900 chuang citizenship pe
Union finance minister Nirmala Sitharaman-i chuan kum ruk kal ta chhung khan Pakistan, Afghanistan leh Bangladesh aṭanga India rama rawn lut, mi 3,900 chuang hnenah India khua leh tui nihna pek a ni tih a sawi.
Minister chuan Indian citizenship pekte hi Pakistan aṭanga lut mi 2,838, Afghanistan mi 914 leh Bangladesh mi 172 an ni tih a sawi bawk. Kum 1964-2008 chhung khan Sri Lanka aṭanga lut, Tamil hnam nuai li chuang zet chu citizenship pek a ni tih a sawi bawk a ni.
Kum 2014 thleng khan Pakistan, Bangladesh leh Afghanistan aṭang rawn lut zinga Muslim mi 566 chu citizenship pek an ni tih minister chuan a sawi. Prime minister Narendra Modi kaihhruai sorkar a din hnuah, kum 2014-18 inkar khan Pakistan aṭanga pem lut mi 1,595 leh Afghanistan aṭanga Muslim rawn lut mi 391 te chu citizenship pek an ni bawk a ni, a ti.