Parliament Monsoon Session tan

Parliament Monsoon Session chu nimin khan ṭan a ni a, August 12 thleng session hi neih a ni ang.

Lok Sabha-ah chuan Prime Minister Narendra Modi-a'n minister atana a ruat tharte a hmelhriattir a, hemi hnu hian June 1-a thi, Madhya Pradesh Lok Sabha MP Dalpat Singh Paraste sunna hun hman a nih hnuin inkhawm hi tihtawp a ni.

Rajya Sabha-ah chuan chairman Mohammad Hamid Ansari-an House member atana thlan tharte rinawmna thu tiamtirin a la lut.

Tun ṭum Parliament fur
ṭhutkhawmah hian sorkar laipui chuan hun rei tak a buaipui tawh, Goods and Services Tax (GST) Bill chu pass ngei a tum a, he bill hi Lok Sabha-ah awlsam taka pass ni mah se, Rajya Sabha-ah BJP kaihhruai NDA hian majority a neih loh avangin Congress party lamin an dan chahsak a ni. Pathianni khan Prime Minister Narendra Modi chuan hun rei tak tihkhawtlai tawh, GST billl hi pass a nih ngei theih nan political party hrang hrangte chu thlawp turin a lo ngen tawh a ni.

Eptuten July 8-a Hizbul Mujahideen firfiak, Burhan Wani thah a nih avanga Kashmir Valley-a buaina chhuak chungchang Rajya Sabha-a sawiho an rawtna chu sorkar lam chuan a remti a, an sawiho zui nghal a ni. Debate hawngtu Congress hruaitu Ghulam Nabi Azad chuan Kashmir-a thil thleng chuan a tina hle tih sawiin, sorkar laipuiin helna tihtawp tuma a beihna chu an thlawp a, hemi rual hian civil mite chunga an chet dan chu an thlawp thei lo tih a sawi. Azad chuan civil mite chu hel ang mai enkawl leh ngaih tur an ni lo, a ti.