Delhi-ah diesel motor kum 10 chin registration titawp dawn

Nation Green Tribunal chuan Delhi traffic hotute hnenah khawpui chhunga diesel motor, kum 10-a upa chin chu an registration titawp turin a hriattir. Delhi regional transport office hnenah city traffic police-te motor registration tihtawp tur list pe turin a hriattir nghal bawk.

Nikum April thla khan NGT chuan Delhi khawpui chhungah diesel motor kum 10 aia upa chin chu tlan a lo khap tawh a ni. Kum 2014 khan court chuan diesel leh petrol motor eng pawh, kum 15 aia upa chu khawpui chhunga tlan phalsak an ni dawn lo tih a lo sawi tawh bawk. Kumin kumtir khan Supreme Court chuan diesel motor liante registration tih thar a phal tawh lo a, diesel taxi zawng zawng chu CNG-a inlet vek turin a ti bawk.

Mahse thupek tihchhuah a ni chung hian Delhi khawpui chhungah diesel motor hluite an la tlanchhuak fo a, city goverment chuan motor hlui tlanchhuah khapna tur hian thuneihna a nei lo niin an sawi.

Delhi khawpui boruak a bawlhhlawh chak avangin nikum khan Tribunal chuan Delhi sorkar hnenah diesel motor hlui tawh tlan khap tur hian a lo ti tawh a, state pawn lam aṭanga diesel motor tlanluh pawh khap a ni dawn tih a sawi bawk.

Khawpui chhung boruak bawlhhlawh zel tur tihziaawm-na kawng khat atana Delhi sorkarin motor number kawpkim leh kawpkim loh a tlanchhawk tir, Odd-Even Scheme chu December thla hian hman leh a ni mai thei tih Delhi Chief Minister Arvind Kejriwal chuan a sawi. Kejriwal chuan thlasik lai hian boruak bawlhhlawh hi a nasa zual hle nia sawiin, hei vang hian Odd-Even Scheme an siam chu hman leh dan tur an ngaihtuah dawn a, hemirual hian motor intlanchhawk tir an nih chhunga public transport system changtlung zawka kalpui dan pawh an ngaihtuah dawn tih a sawi bawk.