PM Modi leh Singapore PM Wong inkawm

Prime minister Narendra Modi chuan nimin, September 5 khan Singapore prime minister Lawrence Wong sawmna bawhzuiin ni hnih chhung cham turin Singapore a tlawh a, meeting an nei nghal a ni.

Inbiakna an neih hma hian Singapore PM Wong chuan PM Modi hi Singapore Parliament House-ah red carpet nen a lo dawngsawng a, Modi hian he hmun tlawhtute hming ziaknaah pawh a hming a ziak ve a ni.

Ram hruaitu pahnihten meeting an neihah hian ram pahnihte thawhdunna hrang hrang - Advanced Manufacturing, Connectivity, Digitalisation, Healthcare & Medicine, Skills Development leh Sustainability chungchangte an sawi. Inbiakna neih zawh hnuah hian ram pahnihte thawhdunna tur inremna, Memorandum of Understanding (MoU) pali an ziak bawk. Inremna an siamte hi Semiconductors, Digital Cooperation, Healthcare and medical research leh Education and Skills developement-te a ni.

Modi hian nimin tlai khan Singapore president Tharman Shanmugaratnam a hmu a, ani bakah senior minister Lee Hsien Loong leh emeritus senior minister Goh Chok Tong te a be bawk. Lee hian Modi tan chawchhun a lo buatsaih sak.

Prime Minister hian Brunei aṭangin Singpore a pan a ni. India Prime minister zingah Brunei ram tlawh hmasa ber a ni a, India mi leh sa lo awmte'n duhsak takin an lo dawngsawng a ni.