Babri Masjid tihchhiat chungchangah BJP hruaitu 20-te hriattirna pek an ni
Supreme Court chuan kum 1992, December 6-a Babri Masjid tihchhiat chungchangah BJP hruaitu 20-te chu insawifiah turin hriattirna a pe a, an zingah hian party hruaitu hlun LK Advani, Murli Manohar Joshi, Union Minister Uma Bharti leh Rajasthan Governor Kalyan Singh-te pawh an tel.
Kum 2010, May 20 khan Allahabad High Court chuan BJP hruaitute hi Babri Masjid tihchhiat kaihhnawiha thubuai siamsak chu a lo hnawl tawh a ni.
Senior counsel Kapil Sibal chuan court hnenah hian Babri mosque case-a petitioner pakhat, Haji Mahmood Ahmad chuan high court thutlukna khin letna hi a thehluh thar leh thu a hrilh a, hemi hnu hian Chief Justice HL Dattu leh Justice Arun Mishra awmna bench chuan BJP hruaitute hriattirna hi a tichhuak a ni. Hemi hma hian high court thutlukna siam danah hian Central Bureau of Investigation (CBI) chuan petition a lo thehlut tawh bawk.
Court chuan CBI pawh hriattirna pein, high court thupek a dodalna chhante sawifiah turin a hrilh nghal a ni.
Thubuai siamsak zingah hian Bal Thackeray pawh a tel a, mahse a thih hnuah list aṭangin a hming paih a ni.
Supreme Court-a CBI-in petiton a thehluh hi kum 2011 March thla daih kha ni tawh mah se tihkhawtlai zel a la ni. Tun ṭum hi Narendra Modi kaihhruai sorkar thar a din hnua ngaihtuah a nih lehna hmasa ber tur a ni.
Kum 1992 December 6 khan Babri Masjid hi tihchhiat a ni a, hei hian ramchhung hmun hrang hrangah nghawng lian tak a nei a, sakhaw inkarah pawh intihbuaina a thlen phah a ni.