Kashmir tuilianin kam lam a pan
Jammu and Kashmir, Kashmir Valley-a tuilian chuan kam lam a pan a, mahse khawchin zirtute'n ruah a la sur chhunzawm dawn niin an sawi.
Police-te chuan Budgam district-a Laden khuaa leiminin a chhilh mi 16-te ruang chu hmuh kim an ni tawh tih an sawi. Leminin in pahnih a hnawl laia awmte pawh an chin hriat kim vek a ni tawh bawk.
Police official-te chuan leiminna hmunah hian khawl lakluh theih a nih loh avangin hna pawh an thawk chak thei lo niin an sawi.
Kar kalta Inrinni tlai aṭang khan Kashmir valley-ah hian nasa takin ruah a sur a, hei hian leimin leh tuilian bawhawk a siam a ni. Jhelum lui pawhin hlauhawm chhinchhiahna a pel hman a, mahse nimin khan lui tui hian kam lam a pan tawh a ni.
Prime Minister Narendra Modi chuan tuilian leh a tuartute dinhmun a hmuna enfiah turin Thawhṭanni khan Union Minister Mukhtar Abbas Naqvi chu Kashmir-ah hian a tir nghal a, hemi ni vek hian sorkar laipui chuan Jammu and Kashmir chhawmdawlna tur hian cheng vaibelchhe 200 pek a nih tur thu a puang nghal bawk.
Kashmir south, north leh central-ahte joint control room siam a ni a, tuilian tuarte awm lailawkna relief camp-ahte ei tur, tui thianghlim, fuel, blanket leh mamawh dangte pek an ni.