Land Bill dodalna kawngzawh hunah Rahul a inlan dawn

Congress vice president Rahul Gandhi chu thla hnih chhung chawlh lain rampawn lamah a awmbo tawh a, April 19-a NDA sorkarin Land Bill a siam danglam duh lohna lantira kawngzawh a huaihawtah mipui hmaah a inlan tawh dawn nia sawi a ni.

Rahul Gandhi hian intuaithar tura chawlh a lak avang hian Parliament session-ah pawh a tel lo a, hei hi rorellai party-te'n an sawisel fo a ni.

March thla tira eptute'n land bill siam danglam duh lo a, sor­kar chu a thu sut leh tura ngena kawng an zawh ṭum pawh khan Rahul hi a awm loh avangin a nu, Congress president Sonia Gandhi chuan kawngzawh hi a lo ho tawh a ni.

Congress party chuan Rahul Gandhi hi a rawn kir hun­ah party president-ah hlankai a tum nia sawi a ni. May thla hian Congress Working Committee leh AICC meeting neih a ni dawn a, hemi hunah hian party president-ah dah rin a ni.