Swach Bharat Mission hmangin kum tin nausen 60,000-70,000 nunna chhan

Prime minister Narendra Modi kaihhruai sorkar hmalakna pakhat, Swachh Bharat Mission hmangin India ramah kumtin nausen 60,000-70,000 nunna chhan him a ni, tiin tun hnaia zirchianna neih chuan a tarlang.

Zirchianna hi state 35-ah kum 2000-2020 chhung khan neih a ni a, Nature magazine-ah an ti chhuak a ni. Zirchianna neitute hi US-a International Food Policy Research Institute ami - Suman Chakrabarti, Soyra Gune, Tim A. Brucker, Julie Strominger leh Parvati Singh te niin, thupuiah “Toilet construction under the Swachh Bharat Mission and infant mortality in India,” tih an hmang.

An zirchianna aṭang hian Swach Bharat Mission hnuaiah 2000-2020, kum 20 chhungin ram pumah ekin tam tak sak a ni leh, hemi hun chhung veka naupiang hlim leh naupang kum nga hnuai lam thi zat tlem chhoh danin inzawmna a neihte an tarlang a ni.

Prime minister Narendra Modi kaihhruaina hnuaiah October 2, 2014 khan Swachh Bharat Mission hi hman theiha tlangzarh niin, hei hian a tum ber chu ekin neih loh vanga pawn lama inthiar mai mai awm ṭhin tihtawp a,India rampuma chhungkua mtd 100 hnena ekin sakna tur pek a ni. Report siamna atan hian states leh Union territories 35 huam chhunga district 640 data te zirchian a ni.

PM Modi chuan report tihchhuah hian a ti lawm hle tih sawiin," Swachh Bharat Mission in a nghawng zirchianna hmuh tur a awm chu a lawmawm hle a ni. Naupiang hlim leh naupangte thihna thleng ṭhin tihtlem kawngah inthiarna mumal tak neih hian nghawng a nei lian hle. Vantlang hriselna atan inthiarna him leh thianghlim neih hi a pawimawh a, India-in heti lama hma a hruai hi ka lawm hle a ni," a ti.