Delhi HC-in Wikipedia hnenah hriattirna pe

Delhi High Court chuan Ningani, September 5 khan Wikipedia hnenah news media, Asian News International (ANI) page edit-tute nihna kimchang puangzar tura court-in thu a lo pek tawh a zawm loh chungchangah hriattirna pein, a vau zui bawk.

Court chuan, "India hi ṭha in ti lo a nih chuan, India ramah thawk lo mai rawh u," tiin, court thupekte an zawm duh dawn lo a nih chuan sorkar laipui hnenah Wikipedia chu India rama titawp mai tura an thlen theih thu a hrilh zui a ni.

ANI hian Wikipedia-a an page-ah thudik tawk lo, midang ngaihdan tibuai leh tihmingchhe thei zawnga thu ziak awmte chu an tih a ni lo tiin Supreme Court-ah a thehlut a ni.

ANI hian an page-a thu ziak ṭhenkhat chu Wikepedia lam hian sorkar lai tana hmanrua tiin an lo edit tih an tarlang.

Hengte hi a nih dan dik tak tarlang a, a source nen thlapa dah an tum leh pawhin Wikiepedia hian lo paihin, a hmaa diklo leh midang kaihruai dik lo thei zawk chuan an lo thlak leh vek bakah a dik zawk pawh chu an lo ti bo a ni, an ti.

August 20 khan court chuan ANI page-a thu post khawih danglam tute nihna kimchang chu karhnih ral hmaa thehlut turin a lo hriattir tawh a, mahse tun thlengin hriattirna hi a la tihlawhtling lo a ni. Wikipedia chuan an hmunpui hi India a nih loh avangin, document thehlut kim tura tih pawhin hun a duh rei a, hei vang hian an la thehlut thei lo niin a sawi ve thung.

Court-in a ngenna an tih hlawhtlin theih loh vang hian ANI lam hian Wikipedia chuan hetiang thil hi a tum reng vanga tih a ni tiin, " dan leh thupek chu tumreng vanga zawmlo an ni" tiin a sawi.