Sonia hi mihang ni se Congress hian a pawm ang em? : Giriraj

Nimina Minister of State for Micro, Small and Medium Enterprises (MSME) Giriraj Singh-'an Congress President, Sonia Gandhi vun rawng chungchang a sawi chuan sawisel a hlawh hle.

Hajipur-a amah thlawptute awm­khawmnaa thu a sawiah, Singh chuan Sonia Gandhi chu 'vun ngo' a nih avanga Congress party hotu lu ber dinhmun luah thei a ni em? tiin fiamthu thawh nan a hmang. "Rajiv Gandhi khan Nigeria mi nupuiah lo nei se, thil hi a danglam vek ang. Congress party hian Sonia hi a pawm thei angem?" tiin a sawi zui bawk. A thusawi lanna video hi TV channel hrang hrangah tihchhuah a ni.

Singh-a thusawi hian sawisel a hlawh zui nghal hle a, Communist Party of India (Marxist) hruaitu Brinda Karat chuan a thusawi chu thil zahthlak leh huatthlalaawm tak a ni, a ti. "Hei hi vunrawng inthliarna a ni a, ka dem takzet a ni. Hetianga inthliarna lam hawi thu hi engtinge a sawichhuah ngam zawk? A thusawi hian mipui dawr­na kawnga a hniamzia a tilang a ni," a ti.

Karat-i chuan, "Kan ramah hetiang thu huathlala tak sawitu thununna tur code of conduct khauh tak a awm a, a vanduaithlak hle a ni. Parliament leh State Assembly pawhin an ngaihtuah a hun hle a ni," tiin a sawi.

Janata Dal (United) hruaitu Sharad Yadav pawhin minister thusawi hi a dem thu sawiin, mi tupawh a vun rawng aiin a nihna chu a pawimawh zawk a ni, a ti.

Congress hruaitute chuan Singh hi an dem thu an sawi nghal bawk a, Prime Minister Narendra Modi chu a minister thusawi avang thupha chawi turin an phut. Party hruai­tu Digvijay Singh chuan Modi hian a minister hi thu huatthlala tak tak sawichhuak tura a dah nia a lan hial thu a sawi.

Singh hian a hma pawhin sawi­sel hlawh tak tak thu a lo sawi­chhuak tawh a ni. Kum 2014 Lok Sabha inthlanpui neih dawn khan Jharkhand-a a campaign-naah Narendra Modi thlawp lo chu Pakistan-ah kal vek rawh se tiin a lo sawi tawh a ni. A thusawi avang hian a lakah FIR pathum ziahluh a ni. Hemi hnu hian firfiakte chu engvangin nge sakhaw pakhat ami vek an nih? tiin ngeiawm takin zawhna a lo siam tawh bawk.