BJP-in bawng talh khap a tumna NCP in sawisel

BJP hruaitu, Union Home Minister Rajnath Singh-a'n India ram pum­ah bawng talh khap tumin sorkar laipuiin hma a la dawn tia a sawi chu National Congress Party (NCP) chuan a sawisel.

NCP thupuangtu, Trajano D'Mello chuan, "He thil hi kan dem a ni. BJP hian inthlan dawna an manifesto-ah khan hemi chungchang hi engmah an tarlang lo," tiin, an thiltih tum chu an slogan 'Sabke saath Sabka vikas' tih nen a inkalh a ni, a ti.

D'Mello chuan bawngsa talh leh khap chuan a bikin Goa hnam hrang hrangte a nghawng nasa dawn hle tih sawiin, party hrang hrang MLA, BJP MLA-te telin Chief Minister Laxmikant Parsekar hnenah ngenna thlen a, Home Minister chu Goa-a bawngsa zawrh leh talh khap ve lo tura nawr turin a ngen.

NCP hotu chuan, "Mi hrang hrang awmkhawm kan nih avang­in ang khata hrut rual theih kan ni lo," a ti. CM Parsekar pawhin an state-ah bawngsa supply chu a titawp dawn lo tih sawiin, a ṭul chuan state dang aṭangin bawngsa an lak luh mai tur thu a sawi bawk.

BJP sorkarna, Maharashtra state-ah chuan bawngsa talh, zawrh leh lakluhte khap a ni tawh a, hei vang hian state chhunga sa zuartute chuan Thawhlehni khan lungawi lohna an lantir.

Sa zuarte chuan sor­kar thutlukna siam chu na taka an dem thu sawiin, a dan siamte a sut leh a nih loh chuan nasa zawka nawrh huaihawt a, kawngpui dan hialte an tum thu an sawi.