Andhra Pradesh khawpui hmingah Amaravathi vuah a ni dawn

Andhra Pradesh sor­kar chuan Vijawada-Guntur biala state khawpui tur an thlan chu a hmingah 'Amaravathi' tih vuah a ni dawn tih a sawi.

Chief Minister N Chan­drababu Naidu kaih­hruaina hnuaia state cabinet meeting chuan state khawpui thar tur hming hi an thlang fel ta a ni.

Nikum khan Andhra Pradesh hi state pahnih, Andhra Pradesh leh Telangana-ah ṭhen a ni a, kum 10 chhung chu Hyderabad hi khawpui inṭawm atan an hmang ang. Mahse kum 2024 hnuah Hyderabad hi Telangana state khawpui a ni tawh dawn a, hei vang hian Andhra Pradesh lam hian state khawpui thar tur a siam a ngai dawn a ni.

Amaravathi hi Guntur district-a awm niin, a awmna hi state laili a ni a, khawpui upa tak, kum 2,000 chuang zet liam taa Satavahana dynasty hun laiin khawpui atan kum 400 chhung hman a lo ni tawh bawk. Hei bakah hian Buddhist sakhaw hmun pawimawh tak takte a awm a, Lord Buddha pawh khan he khua hi a lo tlawh tawh nia hriat a ni. King Ashoka leh China aṭanga rawn kal, Hsuan Tsang-te pawhin an lo tlawh tawh bawk.

State khawpui thar tur cheina atan hian cheng vaibelchhe 20,000 ruahman a ni a, sorkar laipui chuan vaibelchhe 1,500 a pe chhuak tawh a ni. Capital region chhunga loneitute leh ram neitute chuan state khawpui siamna tur atan hian sorkar hnenah ram acre 33,000 a zau an pe a ni.

Amaravathi hi khaw­pui changkang, hmasawn leh nuam taka siam tum a nih thu Naidu chuan a sawi. Singapore-in a thlawna master plan a siamsak pawh an dawng tawh a ni.