PM-in CM leh High Court CJ joint conference a hawng SC Judge-in conference neih hun a sawisel

Prime Minister Narendra Modi chuan nimin khan New Delhi-ah Joint Conference of Chief Justices of High Courts and Chief Ministers of States a hawng.

Joint conference-ah hian High Court Chief justice leh state CM zawng zawngte chu tel vek tura sawm an ni. Conference-ah hian Union Law and Justice Minister DV Sadananda Gowda chuan inlawmna thu a sawi a, Chief Justice of India HL Dattu pawhin thu sawiin, working session a kaihruai nghal a ni.

Prime Minister Modi chuan thu sawiin, judiciary chu hna ropui a ni a, a thawktute chu Pathianin hna ropui tak thawk tura a ruatte an ni a, mipuite pawhin an lakah beisei sang tak an nei a ni, a ti. Hna ropui a nih avang­in technology hmanga thuam chak zel a ngai a ni, tiin a sawi.

Kar kalta Zirtawpni, Good Friday khan High Court Chief justice leh Supreme Court judge conference neih a ni tawh bawk a, Kristiante hun pawimawh, Good Friday leh Easter Sunday-a sor­karin conference a buatsaih hian sawisel a hlawh hle. Supreme Court judge Justice Kurian Joseph chuan PM Modi leh CJI Dattu hnenah hian lehkha a thawn a, Kristiante ni thianghlima conference buatsaih a ni hi a dem thu a sawi a, tunhmain hetiang thil hi a thleng ngai lo tih a sawi.