AAP-in anti-corruption helpline a hawng leh

Delhi-a rorellai, Arvind Kejriwal-a kaihruai Aam Aadmi Party chuan a sorkar hmasak ṭuma a lo tih tawh angin, eiruk dona beihpui thlakna kawng khata atan anti-corruption helpline chu nimin khan a hawng leh.

Anti-corruption helpline number hi 1031 a ni a, he number ah hian mipuite'n sorkar official thamna la leh, thamna pe tura beiseitute chu an report thei dawn a ni. AAP hian an sorkar hmasak khan helpline hi an lo siam tawh a ni.

Talkatora Stadium-a helpline hawnna inkhawmah Delhi CM Kejriwal chuan helpline number thar hi a hawng a ni. He helpline hi chhun zan zawma enkawl leh vil turin volunteer eng emaw zat training tir an ni tawh a, English leh Hindi-a biak theih an ni ang. Helpline kaltlanga complain lutte chu category pahnih- serious leh non-serious ah ṭhen an ni ang.

Complain siamtute chuan officer-te'n thamna an beisei ngei tih emaw, thamna an la ngei emaw tih fiahna tur video/audio record an neih a ngai a ni. An report aṭanga darkar 48 chhungin anti-corruption branch chuan an chhui zui nghal dawn a ni.