Nagpur jail aṭangin mobile handset 28 man

Nagpur-a Central Prison chhungah mobile handset 28 leh cellphone battery 15 man a ni.

Kar hmasa khan jail aṭang hian mitang panga an tlan­chhuak a, hemi hnua jail chhung an endiknaah phone hi an man a ni. Mi panga-te hi barrack number 6-a tâng an ni a, an tanna pindana tukverh feet kua-a sanga bar chu chep chhian, bang feet 23-a sang lawn liamin an tlanchhuak a ni.

Tang tlanchhuak an awm hnu hian uluk takin tan-in chhung hi d ap nghal a ni a, tan-in chhung hmun hrang hrang aṭangin handset hi an man chhuak ta a ni. He thil thleng vang hian Nagpur jail superintendent Vaibhav Kamble chu suspend a ni tawh a, jail official pahnih R G Purekar leh S C Mahashirke-te pawh hrem an ni tawh bawk.

Police-te chuan tang tlan­chhuakte man leh tumin beihpui an thlak nghal a, mahse tun thlengin an la man lo.