PM-in air quality index a tlangzarh

Prime Minister Narendra Modi chuan nimina ni hnih awh tur, Environment Ministry national conference neihah India rama air quality index hmasa ber a hawng.

Air quality index hi khawpui lian 10-ah dah a ni ang a, hemi hmang hian nitina khawpui boruak bawlhhlawh dan level chu mipuite hriattir ṭhin an ni ang.

Conference hawnna inkhawmah thu sawiin, PM chuan conference chu policy ṭha zawk siamna tura sawi hona hun ṭha leh remchang taka an hman a beisei thu a sawi.

Leilung pawimawhzia sawiin, a humhalh chu India mite tih tur pawimawh tak a ni, a ti. Modi chuan leilung tibawrhbang a, lo tichhe turin dikna kan nei lo a ni, a ti bawk.

India mite chu leilung humhalh a, dah pawi­mawh turin a ngen a, khaw­vel sik leh sa inthlak dang­lam chak venna tura hmalaknaah India tha thawh danah ram dangte'n zawhna an siam tawh lo ang, a ti. PM chuan sik leh sa danglam chak veng turin khawvelin a bei mek a, mahse a chinfelna tur kawng hi tun thlengin an la nei lo a ni, a ti.

Modi chuan thil te tham leh ho lam deuh nia ngaih aṭanga bul ṭan a ngai a ni tiin, street light-te pawh thla bial zanah chuan ti eng loin a dah theih a, hei hian energy eng emaw zat a lo khawl theih phah dawn a ni, a ti. India chu leilung humhalh leh nuclear engery lamah hma hruai turin a inpeih a ni tiin PM chuan a sawi bawk.