Yemen aṭangin mi 454 hruai haw an ni tawh

Yemen sorkar leh Houthi helpawlte an rama an inbeih mek avangin Yemen-a India mite hruai chhuak turin Indian Air Force thlawhtheihna pa­hnih tirh a ni a, Pathianni zan khan mi 454 chu Mumbai rawn thlenpui an ni.

IAF official chuan zan dar 10.40 vel khan C-17 Globemaster transport aircrat chu Djibouti aṭangin Mumbai-ah a rawn thleng a, zanlai velah thlawhtheihna dang chu Chhatrapati Shivaji International Airport a rawn thleng ve leh tih a sawi.

Ministry of Defence thupuangtu, Sitanshi Kar chuan Yemen aṭangin India mi 454 te chu him taka hruai haw an nih thu a sawi. External Affairs Minister Sushma Swaraj-i chuan India mi la awmte chu hruaichhuah vek an tum thu a sawi bawk.

Thlawhtheihna bakah lawng hmangin mi 182 chu Al Muqalla lawng chawlh hmun aṭangin hruai chhuah an nih tawh bawk.