India Pilot-te mental health endik uluk dawn
Germanwings co-pilot-in cockpit-ah pilot lut thei loa a khar hnan hnuah France rama an thlawhtheihna a tlak luihpui chuan ram hrang hranga airlines-te dan leh dun siam kawngah nghawng a nei chho zel. Co-pilot chanchin an chhui chiannaah, a hmain depression nasa tak neiin enkawl pawh a lo ni tawh tih hriatchhuah a ni.
Germanwings Airbus vanduaina tawh hnu hian Directorate General of Civil Aviation (DGCA) pawhin Civil Aviation Minister A Gajapathi Raju hoa meeting an neihah, commercial pilot-te rilru leh taksa hriselna lam enfiah chu ngaih pawimawh a, hemi chungchang bikah dan siam thar a rawt.
Dan hman mek hnuaiah pilot-te hi thla ruk danah physical fitness test neihtir an ni ṭhin a, mental health test erawh neihpui a ni lo. Airline an zawm dawna psychometric test neih ṭhin bak a hnuah neihpui an ni tawh lo a ni. Hei vang hian uluk zawka an rilru leh taksa lam hriselna endik sak ṭhin hi rawt a ni.
Pathianni tlai khan Jaipur aṭanga Delhi pana thlawk tur, Air India thlawhtheihna, Airbus A-320 Flight A1611 ah co-pilot-in cockpit chhungah captain nen inhauin captain hi kut a thlak nia sawi a ni. Mahse AI thupuangtu chuan pilot pahnihte hi inhau mah se a hnuah an buaina hi chinfel a nih thu a sawi. Co-pilot hian kum thum hma lam khan flight commander chu cockpit aṭanga ko chhuakin, a kawra arsi inbelte a pawhthlaksak a, a lo tibuai tawh nia sawi a ni. AI leh DGCA chuan a chungchang hi an enfiah mek a, an puhna hi a dik a nih chuan a ṭul angin hma lak a ni ang.