Political party parukte inzawmkhawmna tur tifel dawn hnai

Janata Parivar party paruk-te inzawmkhawmna tur chu tihfel thawkhat a ni tawh a, Samajawadi Party (SP) hotu Mulayam Singh Yadav chuan hemi chung­changah hian thuchhuah a siam thuai dawn.

BJP leh a thurualpui party-te el thei tura Janata Parivar party parukte'n political party lian siam an tumnaah hian Lalu Prasad Yadav-a kaihhruai RJD, Mulayam Singh Yadav-a party SP, Nitish Kumar-a kaihruai Janata Dal (United), PM hlui DH Deve Gowda party Janata Dal (Secular), Om Prakash Chautala kaihhruai Indian National Lok Dal (INLD) bakah Samajwada Janata Party (SJP) te an tel dawn a ni.

Party parukte inzawmkhawm hunah hian symbol pawh pakhat chauh an hmang zui tawh dawn a ni. An inzawmfel hunah party thar hruaitu tur pawh hi puan a ni ang.

RJD hotu Lalu Prasad Yadav-a chuan party inzawmkhawmnah hian secular party dangte pawh tel turin a sawm a, hemi rual hian BJP a sawisel nghal bawk. Lalu chuan, "BJP chu kan ram bumtu a ni a, an pawl innghahna ber pawh inbumna a ni," a ti. BJP chuan inthlanpui dawna an thutiamah thuneihna an chan chuan ram pawn lama sum chheprelh, cheng vaibelchhe nuai 26.5 chu an la let nghal ang a, heng sumte hi ram mipuite hnenah an bank account kaltlangin cheng nuai 1.5-2 thlengin thunsak vek an ni ang, tiin an tiam a ni. Heng an thutiamte hi mipuite an bumna mai a ni, tiin Lalu chuan a sawi.

RJD hotu chuan BJP in kumtina ṭhalai hna thawh tur vaibelchhe 2 siam a tiam pawh a hlen lo a, loneitute ngaihthahin, sumdawng leh mi hausa zawkte duhsak zawngin Land Acquisition Bill pawh a siam danglam a ni, a ti.

Party paruk inzawmkhawm tur chu national party lian ber a ni thei dawn a, hei hi BJP chuan a hlau a ni tiin SP hruaitu Naresh Agarwal chuan a sawi.