Kenya aṭangin cheetah lak luh belh tum

Sorkar laipui chuan Kenya ram aṭangin cheetah lakluh belh a tum tih official-ten an sawi.

India hian southern hemisphere ram - South Africa leh Namibia aṭanga cheetah a lo lak luh tawhah harsatna tawk in, ṭhenkhat an thih zui tak avangin India sik leh sa nena inmil deuh tur nia ngaih, northern hemisphere ram, Kenya aṭang hian lak luh belh a tum leh ta a ni.

Cheetah lak luhna tur atan Kenya nen hian Memorandum of Understanding (MoU) thar an ziak dawn a, Ministry of External Affairs-ah an lo enfiah turin a draft pawh thawn a ni tawh bawk.

Kenya aṭang hian Cheetah 8-10 lak luh an tum chu an inremna siam chungchangah Kenya lamin an ngaihdan an thlak avangin kumin February khan chawlh san lailawk a ni. Mahse August thlaa official-ten Kenya ram an tlawh hnuah, MoU thar ziak tur hian an inrem leh thei ta a ni. Kenyan lam aiawhte pawh India ramah rawn kal tawhin Kuno National Park an tlawh a, a hmunhma leh inrelbawlna te chuan an mit a tlung hle nia sawi a ni. " MoU-ah hian Wildlife Institute of India nena hun rei tak thawh hona neihna tur pawh telh an duh a, heng zingah hian an ram humhalh hna thawhna kawnga forest staff-te training pek ṭhin leh institution dinna turte pawh telh an duh a ni," a ti.

Kuno National Park-ah hian cheetah 25 awm mekin an zingah hian note 12 an tel. March 2023 leh August 24 inkarah cheetah hi a puitling panga leh no panga an thi a ni. Cheetah te hi southern hemisphere aṭanga northern hemisphere-a sawn hian an awmdan leh nihphungah nghawng nasa takin a nei ṭhin. Southern hemisphere-a cheng cheetah hi thlasikah an nghawng leh an dar velah hmul chhah tak a ṭo a, Kuno-ah erawh hi chuan thlasik laiin boruak lum, hnawng leh ruahsur te a thleng tel avangin hei hi an tuar nia ngaih a ni.