Maha sorkarin kel talh leh a sa zawrh khap leh a tum

Maharashtra sorkar chuan an state chhung­a bawng talh leh a sa zawrh, kawl leh lakluh khapna dan a siam hnuah, kel talh leh a sa zawrh pawh khap leh a tum.

Bawng, lawi leh sial sate khap a nih chung­changah Bombay High Court-ah petition thehluh a ni a, hemi chungchang ngaihtuahtu Justice VM Kanade leh AR Joshi awmna bench chuan, "Eng vangin nge state sorkar­in bawng, sial leh lawite chauh a khap a, ransa dang a khap loh?," tiin a zawt. Hei hi chhangin, advocate general Sunil Manohar chuan kel talh khap chung­chang hi sorkar chuan a ngaihtuah mek a ni, a ti.

Advocate chuan, "Bawng talh khapna siam hi a bul ṭanna chauh a ni. Ransa dang talh khapna tur pawh ngaihtuah mek a ni a, tuna rih chuan state sorkar hian bawng leh sialte hi humhalh a ṭul a ti a ni," tiin a chhang.

Petition thehluhah hian state sorkarin an state chhungah bawng leh sa dangte hi talh khap mah se, state pawn lam aṭanga a sa te lakluh phalsak turin an phut a ni.