Eptute'n PM Modi thusawi an sawisel

Prime Minister Narendra Modi-a'n judiciary chuan 'five-star activist' te an veng tur a ni tia a sawi chu eptu lamin an ngaithiam lo hle a, a thusawi chungchangah PM hi na takin an sawisel.

Congress hruaitu, Digvijay Singh chuan, "Independent body, judiciary chungchanga hetianga thu a sawi hi thil ṭha lo tak a ni. Five-star activist tia a sawite ṭan zawnga sawi a ni. Five-star activist hi an awm lo a, hei hi judiciary chungchang sawichhiatna pawi tak a ni," a ti.

AAP laka hel, Prashan Bhuhsan pawhin PM thusawi chu court zah lohna, thil awm lo tak a ni tih a sawi. Bhushan chuan loneitute duhsak lo zawnga land bill siam danglamtu sorkar kaihruaituin hetiang thu hi a sawi a ni, a ti.

CPI-M hruaitu Brinda Karat pawhin Modi chuan amah ngei pawhin suit cheng nuai 10 man a hak laiin five-star activist chungchang a sawi a ni, a ti. Karat chuan a thusawi aṭangin PM chuan demo­cracy kalphung chung­changa a ngaihdan a tilang chiang hle a ni tiin a sawi bawk. "Kan ramah chuan sorkarin a ti dik tawk lo nia kan hriat chuan Supreme Court-ah petition kan thehlut thei a ni. Cheng nuai 10 man suit ha khan five-star activist tihte a sawi a nia," a ti.

Modi hian Pathiannia High Court chief justice leh state chief minister-te conference neihnaah hemi chungchang hi a sawichhuak a, "Ram danpui zulzuiin awlsam takin rorelna dik a hlen chhuah theih a ni. Hetihlai hian an thil leh hmuh danin a kaihhruai tlatte laka fimkhur a ngai a, heng mite hi five-star activist-te an ni," tiin a sawi.

Aam Aadmi Party (AAP) chuan PM thusawi chu ngaihdan dik tak neite upbeh tumna a ni tiin, officer-te hnenah NGO leh mipui, sorkar laka an lungawi lohna thu lantira auchhuah puitute laka na taka action la tura a signal-na a ni, a ti.