Amnesty International-in India-a an hnathawh titawp
Human rights watchdog Amnesty International chuan an bank account chu khawihchet theih loha (freeze) sorkarin a dahsak avangin India-a an hnathawh an titawp.
Nimin khan Amnesty International India chuan thuchhuah siamin, September 10 khan India-a an unit bank account chu sorkar laipui chuan khawihchet theih lohin a hreksak a, hei vang hian an staff-te chuan campaign leh research chungchanga hna an thawhnaah harsatna an tawk a, an hna thawh chu chawlhsan tura tihna nia an ngaih thu a tarlang.
Kum hnih kal ta aṭang tawh khan Amnesty International hi India sorkar chuan hnawk a tih tawh thu pawh Amnesty chuan a tarlang a, an unit bank account khawihchet theih loha siamsak a ni chu tihpalh thil thu a ni lo tiin a tarlang bawk.
Kumina February-a Delhi-a buaina thlengah leh sorkar laipuiin Jammu & Kashmir tana siam Article 370 a ṭhiah avanga J&K mite harsatna tawh chungchang Amnesty-in a chhuinaah human rights dan palzutna tiin a lo tarlang tawh a, hei vang hian sorkar chuan phuba a la nia an ngaih thu Amnesty International India chuan a tarlang a ni. Hemi chungchangah hian home ministry chuan thuchhuah a la nei lo. Amnesty hian India rama thil chhui ngai tam tak an lo chhui ve tawh ṭhin a, sorkar chuan tualchhung dan a hmang dik lo fo niin a lo tarlang tawh ṭhin.
Hetih lai hian sorkar chuan Amnesty tana ramdang aṭanga fund dawn chu dan dik lo niin a lo sawi tawh a, fund a dawn chungchang hi Enforcement Directorate chuan a chhui mek niin official chuan a sawi. Home ministry chuan Amnesty hian fund hi FDI (Foreign Direct Investment) kaltlanga an dawn thu sawiin, mahse hei hi non-profit atana phal loh a nih thu a hmain a lo tarlang bawk.
Kum 2017 khan Enforcement Directorate chuan Amnesty bank account hi khawihchet theih lohin a lo dahsak tawh a, court-ah Amnesty lamin an khin hnuah hnehna an chang a ni. Nikum khan CBI chuan ministry phalna loin Amnesty International UK chuan Amnesty India tan cheng vaibelchhe 10 a transfer nia puh chungchangah thubuai a lo siamsak tawh a, hei bakah hian home ministry phalna loin UK-a pawl hrang hrang aṭangin Amnesty India tan cheng vaibelchhe 26 pek a ni bawk niin an tarlang.