AP-ah sandalwood smuggler 20 kahhlum an ni

Nimin zing khan Chittoor district-a Sesshachalam forest-ah red sandalwood (red sander) tawlhrutute leh Andhra Pradesh special police leh forest guard-te telna, joint team chu inkapin, sandalwood smuggler 20 kahhlum an ni.

Inbeih thlenna hmun hi Etagunta leh Vacchinodu Banda, Chandragiri ngaw chhungah a ni. Etagunta-ah hian smuggler pakua kahhlum an ni a, midang 11 hi Vacchinodu Banda hmunah kahhlum an ni.

Tun ṭum hi Andra Pradesh-a red sandalwood smuggler leh police-te inbeihna thleng lian ber a ni.

Red sander hi thingkung vang tawh tak, a ral mai hlauhthawnawm a ni a, Tamil Nadu leh Karnataka state-a ramngaw ṭhenkhatah hmuh tur a la awm. Hei vang hian AP sorkar chuan red sander humhalh hna hi ngawrh zawkin a thawk mek a ni.

Special task force deputy inspector general Kanta Rao chuan red sander smuggler-te hian police-forest team chu lung, hrei leh chem hmangin an bei a, hei vang hian silai an hmetpuak ta niin a sawi. An inbeihnaah hian smuggler 20 an thih bakah police pahnihin hliam an tuar.